Carta ao Concello de Redondela
D. Javier Bas Corugeira
Alcalde do Concello de Redondela
Prezado señor:
Na plataforma ProLingua somos conscientes do labor que no concello que vostede preside se leva a cabo a prol da normalización lingüística. Esta vontade de normalización superou os límites da vila de Redondela e actuou como guieiro para outros concellos que se inspiraron no traballo por vostedes iniciado e permitíronlles seguir camiños claramente sinalados.
Son moitas as iniciativas normalizadoras que naceron en Redondela e non é este o lugar idóneo para enumeralas exhaustivamente. Cómpre salientar, con todo, o Premio Blanco Amor de novela longa ou a Ordenanza reguladora do uso do galego no Concello de Redondela, de 1998, verdadeira declaración de principios na que se regula a utilización da lingua galega nas actuacións administrativas internas e nas relacións cos cidadáns e coas entidades públicas e privadas.
Ao rego disto último, lamentamos profundamente a presenza de varios anuncios do Centro Deportivo Serviocio que claramente incumpren o disposto na Ordenanza normalizadora do propio Concello. E igualmente sentimos as reiteradas transgresións da norma na sinalización dos edificios municipais e na rotulación viaria de competencia municipal. É por isto que dende ProLingua lle rogamos que canto antes se corrixa o incumprimento explicado máis arriba, á vez que arelamos que o Concello de Redondela siga a traballar arreo pola normalización e dignificación da nosa lingua.
Reciba un cordial saúdo
ProLingua, 3 de abril de 2014