OCCITAN [OCCITANO]

Manifèst

INTRODUCCION

La lenga galiciana es lo patrimòni immaterial mai presat del pòble galician, que nos identifica coma çò que sèm, Galicianas e Galicians, e nos balha una plaça pròpria dins lo mond.

ANTECEDENTS

Los Galicians sèm fièrs d’aver una lenga millenària al passat gloriós, que las circonstàncias politicas bandiguèron dins un tunèl de silènci forçat dempuèi las primièras decadas del sègle XVI. A mai, la lenga nòstra èra venguda una aisina d’exclusion e de patiment moral e fisic d’una tièra de generacions. L’emplec oral ininterromput per lo pòble, e mai lo trabalh dels elèits intellectuals que dempuèi lo sègle XIX capitèron a reabilitar la lenga, a salvat l’element principal d’identitat dels Galicians e la basa essenciala de nòstra cultura.
Grácias al trabalh de tant de mond Galícia es demorada una nacion istorica, e uèi son autonomia politica a permés als successius governaments autonomics d’apevar e d’engimbrar la recuperacion sociala de la lenga galiciana, mai que mai dins l’airal de l’ensenhament, de l’administracion e dels mejans de comunicacion publics.

PRESENTACION

ProLingua es una plataforma bastida per de personas d’ideologia e de professions fòrça divèrsas amb la tòca exclusiva de promòure lo galician coma lenga nacionala de Galícia (e de las encontradas limitròfas) e d’aténher l’oficialitat reala, çò qu’exigís que siá normalament presenta dins los airals qu’ara n’és practicament forabandida: l’entrepresa, la justícia e mai d’autres servicis publics e privats, particularament los mejans de comunicacion.
ProLingua declara, doncas, totalament irrenunciable lo contengut intègre de la “Lei de Normalización Lingüística” de 1983, e mai del “Plan Xeral de Normalización da Lingua Galega” de 2004, aprovats a l’unanimitat pel Parlament de Galícia.
Sèm dins un Estat de drech e, coma ciutadanas e ciutadans, exigissèm que s’aplican d’a fons las leis promulgadas de natura linguistica.
Tanben exigissèm, parièrament, d’adoptar pas cap de mesura legislativa qu’implique una demesida dels dreches de las Galiacianas e dels Galicians per çò qu’es de la coneissença e de l’usatge del galician e per çò qu’es del signe d’identitat galiciana que representa.

FONCIONAMENT

-L’unica condicion exigida a qui que siá que desire de far part d’aicesta plataforma es de s’engatjar per la defensa de la lenga galiciana e per la promocion de son usatge dins totes los domenis tan públics coma privats.

-Per çò que la lenga galiciana es lo patrimòni del pòble galician, rebutam tota pretension de qui que siá de se l’apropriar o de l’atribuir a cap de grop o d’ideologia quales que sián. Per aquela rason ProLingua es una plataforma fòra partit e plurala e aital se declara.

-Los integrants de ProLingua ne son membres a títol personal e, doncas, i pòdon pas representar cap de grop o d’associacion.

-ProLingua promourà d’accions de tota mena per tal d’aténher sos objectius, mas s’associarà pas mai a cap d’accion forana, quitament se, a títol individual, sos membres auràn sempre plena libertat d’i participar.

-En tota accion jol logotip de ProLingua, n’i poirà pas mai paréisser cap d’autre, qual que ne siá la motivacion o la categoria.

-Cada membre es, en plena egalitat, representant de ProLingua e n’a pas d’autra foncion d’interlocucion amb los poders publics que d’arribar integralament a sos objectius.