MIRANDÉS [MIRANDÉS]

MANIFIESTO

Tradución: António Bárbolo Alves

ANTRADA

La Lhéngua Galhega ye l bien eimaterial mais balioso de l pobo galhego. Ye aquilho que mos eidentefica i mos armana cun l que somos, galhegas i galhegos, i l que mos dá un lhugar própio an ne mundo.

ANTECEDENTES

Ls galhegos sentimos-mos ourgulhosos de tener ua lhéngua milenar i cun un glorioso passado que, por acausos políticos, antrou nun buraco de siléncio forçado nas purmeiras décadas de l seclo XVI até se tornar nun anstrumento de marginalizaçon i xufrimiento moral i físico de muitas giraçones. L uso oural cuntinado que deilha fizo la populaçon houmilde i l trabalho de las élites antelectuales qu’a partir de l seclo XIX soubírun reabilitá-la, tornórun possible salbar l que ye l prancipal eilemento d’eidentidade de ls galegos i l’alheçace prancipal de la nuossa cultura.
L trabalho de todas essas pessonas fizo qu’hoije la Galiza seia ua nacionalidade stórica i que cunte cun autonomie política, i ls diferentes gobernos autonómicos fúrun ponendo ls alheçaces pa la recuperaçon social de la lhéngua galhega, particularmente nos campos de l’ansino, de l’administraçon i de ls meios de comunicaçon públicos.

APRESENTAÇON

ProLingua ye ua plataforma criada por pessonas de las mais dibersas eideologies i profissones que ténen cumo oubjetibos sclusibos la promoçon de l galhego cumo lhéngua própia de la Galiza (i de las comarcas bezinas) i la cunquista de la sue oufecialidade rial, que passa por ua preséncia normal nos campos an que se manten praticamente scluída, cumo l ampresarial, l judiciairo i outros serbícios públicos i pribados, specialmente ls meios de comunicaçon.
An resultado disto, çclaramos cumo oubjetibos eirrenunciables de ProLingua la totalidade de ls cuntenidos de l’atual Lei de Normalizaçon Lhenguística de 1983 i l Plano Giral de Normalizaçon de la Lhéngua Galhega de 2004, que tubírun, an dambos ls causos, l’aprobaçon por ounanimidade de l Parlamento de la Galiza.
Stamos nun Stado de dreito i cumo cidadanos i cidadanas eisegimos que se cumpra de modo pleno la legislaçon eijistente an matéria lhenguística.
Dessa forma, eisegimos que nun se lhiebe a cabo ningua medida lhegislatiba que suponga la perda de dreitos por parte de las galegas i de ls galhegos a usáren i conhecéren la lhéngua galhega i a fazer deilha l sou sinal d’eidentidade galhega.

FUNCIONAMIENTO

- Stabeléce-se cumo requejito único a la pessonas que quérgan pertenecer a esta plataforma, l’antençon de se cumprometéren na defesa de la lhéngua galhega i na promoçon de l sou uso an todos ls campos, tanto públicos cumo pribados.

- Ua beç que la lhéngua galhega ye património de l pobo galhego, recusamos qualquiera pretenson de s’apropriar deilha ou de la poner al serbício de qualquiera grupo ou eideologie de natureza particular. Por isso, ProLingua se çclara ua plataforma nó-partidária i plural.

- Ls membros de ProLingua son-lo a título pessoal i nun lhieban cun eilhes representatibidade ningua de grupos ou associaçones na sua pertença a esta plataforma.

- ProLingua promoberá açones de todo tipo, ancaminadas para cunseguir ls sous oubjetibos, mas nunca s’associará cumo ProLingua a ningua açon alhena, a la que teneran toda la lhiberdade de s’agregar las pessonas que l’antégran de forma andebidual.

- Quando nua açon stubir presente l logotipo de ProLingua nunca poderá figurar ningun outro, seia qual fur l sou tipo ou motibaçon.

- La representatibidade de ProLingua recai na totalidade de ls sous membros an total eigualdade i tenerá cumo único meio d’anterlocuçon cun ls poderes públicos: l anteiro cumprimento de ls sous oubjetibos.