ENVÍA A TÚA INDIGNACIÓN A GAS NATURAL FENOSA
Ante a noticia aparecida hoxe nos medios de que Gas Natural Fenosa pretende eliminar o idioma galego da súa relación coa clientela, decisión relacionada co despedimento de gran número de persoal radicado en Galicia, ProLingua manifesta o seu absoluto rexeitamento (detallamos as razóns no modelo de protesta que verás abaixo) e chama pola sociedade galega, especialmente por quen mantemos relacións comerciais con Gas Natural Fenosa, para que manifeste a súa indignación ante esta acción inxustificable, lesiva cos dereitos da clientela e discriminatoria con respecto á práctica da empresa noutros territorios do Estado.
Neste enderezo da sección "Reputación e Responsabilidade Corporativa" podes mostrar a túa indignación coa inminente medida sumándote desde o seguinte texto (ou outro da túa preferencia):
ASUNTO:
INTOLERABLE AGRESIÓN Á CLIENTELA GALEGA E AO CADRO DE PERSOAL
MENSAXE:
Aos/ás responsables de Reputación e Responsabilidade Corporativa
Son cliente de Gas Natural – Fenosa e quero manifestar a miña indignación ante as informacións de que a empresa ten previsto despedir, a partir do 1 de xuño, os empregados e empregadas que se encargar de atender a clientela desde Galicia.
Para min esa atención próxima significa cousas tan importantes como:
-que a persoa sentada ao outro lado do teléfono entende o que lle digo
-que ademais, fale o que fale, a persoa que me atende desde Galicia está familiarizada cos nosos trazos culturais. Sabe vostede o difícil que é explicar onde se localiza unha avería a quen non ten nin idea da estrutura xeográfica deste país?
-que se manteñen postos de traballo fundamentais neste tempo de crise económica
Envío esta comunicación, polo tanto, para que saiba que de levar a cabo os despedimentos anunciados non só participarei en todas as campañas de denuncia similares a esta, senón que tratarei de unirme ás persoas indignadas con tal decisión para buscarmos unha empresa que SI nos entenda cando falamos e cando lle comunicamos un problema. Sabemos que esta medida, ademais de arbitraria, será discriminatoria porque nos consta que NON van suprimir o persoal catalán en Cataluña.
Recórdolle finalmente que os despedimentos previstos en Galicia van contra os principios mesmos de Gas Natural – Fenosa, en cuxa web corporativa podemos ler o seguinte (citas textuais):
“9 .Imaxe e reputación corporativa
Gas Natural Fenosa considera que un dos elementos básicos que contribúen á súa imaxe e reputación corporativa é o establecemento de relacións de cidadanía responsable naquelas comunidades nas que desenvolve a súa actividade.”
“12. Relacións cos clientes
Gas Natural Fenosa asume, lidera e impulsa o compromiso coa calidade, facilitando os recursos necesarios para acadar a excelencia e establecendo as medidas apropiadas para asegurar que a política de calidade sexa practicada por todos os empregados de acordo con estes principios.”
Esixindo como cliente que atenda a miña petición, envíolle un saúdo.
- Tags:
- atención cliente empresa lingua